скоро:

    follow me on Twitter

    среда, октомври 25, 2006

    Тиква, преместување, унапредување и перални

    Преместување

    Ако некогаш решите да се местите од едно место до друго место на живеење во Чикаго или на кое било друго место во Америка она што ви треба е:
    - пари (прво и најважно)
    - комбе (го земав од ју-хаул)
    - пица и пиво за американските помагачи
    - пица, пиво и цигари за балканските помагачи
    - и пак пари.

    Не сум верувал дека преместувањето може да биде толку голем психички, физички и финансиски тромоз. Преместувањето од едно до друго место со сите потребни нови работи низ домот ме чинеше околу 400 долари плус трошоците на моите две цимерки. Нов тепих требало, нови садови, крпи, кревет и разно разни други бакрачи. Велат сум поминал релативно евтино. Ха, да.

    Општествени перални

    За овие година и неколку месеци колку сум во Америка мислев дека сум ги иживеал сите аспекти на американскиот начин на живот, но не било така. Не сум гледал утакмица на американски фудбал и безбол во живо и еј.. не сум перел во општествена перална. Во куќата во која што се преместив да живеам пералната не ми работи а газдарицата (македонка) не сака да чуе да ја поправи па морав да отидам за прв пат во општествена перална - онаму каде што пере најниската американска класа во која што спаѓам и јас. Пералната се наоѓа на околу десетина блока од мене. Ги собрав сите извалкани алишта што ги имав, ги ставив во куферот на цимерката и се качив на автобус по кое што морав да го влечкам уште четири блока. Влегов внатре и видов околу педесетина перални и сушили во сите димензии. Американските перални и сушилни работат на квортери (25 центи) и едно перење во најмалите перални е 1.75 и 0.25 за секои десет минути сушење. Ја ставив сушилната само на десет минути и после си ги најдов алиштата мокри по што морав да ги пуштам уште дваесетина минути за да ги најдам мокри пак. Колку време им треба на едни алишта да се исушат? - го питав мексиканецот кој работеше во пералната - кој со неразбирлив англиски ми одговори дека најмалку треба да ги оставам 40-60 минути зависност од тоа што перам. Луѓето кои перат внатре не се американци, туку најчесто афроамериканци и мексиканци со неколку деца кои што трчаат и врескаат низ пералната и по некој белец - најчесто студент. Кога исправ се изначекав автобус за да се вратам дома пошто морав да го влечкам куферот десет блока пешки.

    Тиква

    Со идењето на есента во Чикаго (море каква есен.. жив студ е овде) се се врти околу тиквите и ноќта на вештерките. Пита со тиква, пијалоци со тиква, шпагети со вкус на тиква, колачи со вкус на тиква. Тиквата е симбол и застрашувачкиот изглед на баровите, продавниците се популари - дури и таксињата. Кај мене дома единствениот `страшен` детал кој што го имам е костурот закачен на лустерот во кујната. Почна да се зборува за забави на ноќта на вештериките, кој како ќе бил и што. Јас веројатно ќе се маскирам во..... имигрант. :)

    Унапредување

    Ако работите за некоја американска корпорација која да речеме во Чикаго има неколку канцеларии, продавници, банки, ресторанти или било што ако некогаш бидете унапредени ќе ве преместат од едно на друго место. Причината била од раководствена гледна точка: оние кои биле на исто равниште со тебе во моментот не баш лесно ќе те прифатат како шеф. Си можел да имаш проблеми со нивното однесување и немало да те земат на сериозно особено ако си створил пријателски односи со нив. Исто ти е забрането да се дружиш и да ствараш било какви емоционални и сексуални врски со оние кои се над и под твоето рамниште. Односот со нив требало да ти биде исклучително професионален. Многу од овие работи ми изгледаат смешни но логични. Поради таа причина сега ќе мора да патувам дваесетина (триесетина во гужва) минути повеќе до работа.

    четврток, октомври 12, 2006

    За луѓето - дел 1

    Хуан седеше точно спроти мене. Хуан е латиноамериканец, мајка му е мексиканка а татко му е од Гватемала . Дојдени се пред околу дваесетина години во Америка. Никогаш не бил во Мексико, ниту пак бил во Гватемала. За земјите од кои потекнуваат неговите родители знае од нивните кажувања и кажувањата на баба му која само двапати ја видел во животот како и од културата која на Американизиран начин му е презентирана. Хуан збори со типично латиноамерикански акцент завлечувајќи на некои зборови, и се обидува да збори и да не му се личи акцентот. Обожава бачата како и такос, буритос, тортас и се друго што е латиноамериканско. Живее во соседство каде што секаде пишува на Шпански, оди во училиште каде што има најмногу латиноамериканци и се дружи со такви. Има по некој црнец и по некој бел пријател како и некои имигранти од земји за кои што не е чул. Хуан не сонува за престижен живот кога ќе се развие како личност - сака да најде мајка на своите деца, да живее блиску до семејството и да работи нешто што не изискува многу од него. Нешто како Бургер Кинг и МекДоналдс. Не мож да си дозволи образование во колеџ. Не ни сака. Сака фамилијарен живот.

    вторник, октомври 03, 2006

    Иде.ли?

    Стојчо фала. Фала ти и Иде.ли што ми го зедовте моето размислување и го ставивте на сајтот. Статијката ми е ставена тука преведена на Бугарски.

    Изненаден сум од националистичките коментари на бившите ми соседи - Бугари. Ха. Читај тука да знаете што мислам за вас. Како не ви е срам така да зборите бе?

    „Македонска му работа - това му харесвало ,онова не !Сърбите как ви изпраха мозъците , не е истина ! Ама живейте си по-живо , по-здраво и не се интересувайте за България , щото нас хич не ни е еня за вас !“ -

    Господине - јас се интересирам не само за Бугарија туку и за цел свет. Знаете ли што е глобализација?

    „единствената разлика между FYROM и Шопска е, че вие успехте да си напраите своја држава, а ние уште сме част од бугаристан. но еден дан че дојде миго на истината и за нас - да живеје независна Република Шопска“

    Ќе најдете ли некој да ви ги „испере“ мозоците?

    „Това неосъзнато българче от Провинция Македония със сръбско име се мисли за оригинален. Нищо оригинално не казваш, момче! Мислиш, че пробутваш тънка ирония - но не ти стиска да стигнеш до преподавателите си в Пловдив. За 4 години явно само си консумирал в България във всякъкъв аспект.“

    Како мислиш не ми „стиска“ да стигнам до професорите ми до Пловдив? Не те разбирам. И сакаш да кажеш дека јас за четири години само сум ја користел Бугарија?

    понеделник, октомври 02, 2006

    02 Октомври 2006

    Поради немање на време и замарање со милион глупости во последно време мојот пост ќе го сумирам во неколку поточки кои би требало да бидат многу поголеми постови.

    1. Во Чикаго се случи нов наплив на имигранти (студенти) кои после патувачка виза решиле да се преместат во Чикаго каде на оние кои јас ги познавам мојот стан им е место за времен престој. :)

    2. Чикаго е премногу тажен и депресивен во последниот период. Чести дождови, грмотевици, паѓање на лисја. Целиот спектар го дополнува џезот на црнецот кој што свири на постојката до мојата зграда.

    3. Веќе година и неколку месеца сум имигрант и разбрав дека за да можеш да комуницираш 100 % со американците треба да си 100 % лицемер и 100 % дипломат, кое не велам дека е е лошо.

    4. Не сум имал слободен викенд веќе половина година и не можам да излезам во Чикаго.

    5. Ролинг Стоунс ќе свират во Чикаго наредниот викенд ако го земам слободен ќе отидам.

    6. Ќе најдам повеќе време за блогов.